کابل(غورځنگ): د شمالي اتلانتيک ناټو تړون سرمنشي ياپ ديهوپ شيفر وايي چې په افغانستان کې ښې او رڼې ټاکنې يې غوښتنه ده او ددغه شان ټاکنو لپاره يې چې څه له لاسه کېږي وبه يې کړي. هغه تېره شپه په کابل سرينا کې د وينا پر مهال له افغانانو وغوښتل چې په ټاکنو کې برخه واخلي، دا ځکه چې ټاکنې د افغانانو برخليک ټاکي او افغانستان هم د افغانانو وطن دى.
نوموړي بهرني ځواکونه په افغانستان کې د مېلمنو په توگه ياد کړل او ويې ويل چې د افغان امنيتي ځواکونو ترڅنگ به د ټاکنو امنيت ونيسي. 
هغه له دغې وينا وړاندې د ټاکنو له دوو کانديدانو ډاکټر اشرف غني احمدزي او ډاکټر عبدالله عبدالله سره هم د رسنيو له حضور پرته وکتل. که څه هم د هغوى د خبرو جزئيات نه دي په ډاگه شوي، خو داسې انگېرل کېږي چې د راتلونکو ټاکنو او امنيت په اړه به يې خبرې کړې وي. ددې ټولو ترڅنگ ډېرو ته دا پوښتنه پيدا کېږي چې ولې شيفر د ٤١ کانديدانو له ډلې يوازې له دوو تنو سره وکتل؟ شنونکي په دې اند دي چې ناټو او امريکا له تېرو اتو کلونو راهيسې د افغانستان په سياسي او نظامي بدلونونو حاکمه ده او ښايي په دې ټاکنو کې هم له خپل همدغه حاکميت نه کار واخلي.
د يادونې وړ ده چې دا د ناټو سازمان د سرمنشي په توگه د ياپ ديهوپ شيفر د کار وروستۍ ورځې دي او له ده وروسته ددغه سازمان مشري بل چاته سپارل کېږي.