|
حامد كرزی بيا د افغانستان جمهور ريس شو |
|
|
|
ع.ن
|
|
نېټه : دوه نۍ ، د ۱۳۸۸ لمريز کال د لړم ۱۱ - مه |
|
د ټول ټاکنو د خپلواک کمسيون مشر عزيزالله لودين نن ( دوشنبې) پلازمينه کابل کې د يويې خبري غونډې پرمهال اعلام وکړ چې حامد کرزی د (1388) لمريز کال په ټول ټاکنو کې د زياتو رايو د ګټلو او د ټاکنو په دوهم پړاو کې د سيال د نه لرلو له امله بريالی او يو ځل بيا د افغانستان جمهور ريس دئ. نوموړي وويل چې د لړم د شپاړلسمې نيټې ټاکنو ته اړتيا نه ليدل کيږي او ټاکنې به ترسره نه شئ.
په کابل کې د امريکا سفارت د يويې خبرپاڼې په خپرولو سره حامدکرزي ته د افغانستان په تاريخي ټول ټاکنو کې برياليتوب ويلې او له هغه سره يې د همکارۍ د دوام ټټر وهلئ. برتانيې او د ملګرو ملتونو ټولنې هم د خبرپاڼو په خپرولو سره کرزي ته مبارکي ويلې.
د ټاکنو خپلواک کمسيون وروسته له هغه د حامد کرزي د برياليتوب اعلام وکړ چې د هغه سيال ډاکترعبدالله عبدالله يوه ورځ وړاندې د ټاکنو په دوهم پړاو کې د نه ګډون اعلام كړی وو. د ټاکنو د خپلواک کمسيون له اعلام څو ساعته وړاندې حامد کرزي د آزادۍ له راډيو سره په يوه مرکه کې ويلې وو: (دابه دافغانستان په خير وي چې زه او ښاغلی عبدالله عبدالله په ګډه انتخاباتو ته لاړشو،اساسي قانون تطبيق شي او دولسواکۍ هغه لاره په هېوادکې بنسټيزه کړو چې دهغې له مخې دخلکو په رايه حکومتونه ټاکل کيږي).
د حامد کرزي د ولسمشرۍ په لومړۍ دوره کې د خلکو هيلې دا وې چې امنيت ټينګ، قانون حاکم، د زورواکو وزرونه مات، د بې کارۍ لمنه ټوله، دپلازمينې په ګډون د هيواد ټولې ويجاړې فابريکې بيرته فعالې، د تيارو کوټو څراغونه روښانه او د لسګونو داسې بنسټيزو پروژو چارې عملا پيل او ترسره شي، خو لکه څنګه چې وليدل شول د هغوې دا هيلې د کلونو په تيريدو اوس هم نه دي پوره شوې.
آيا حامد کرزی به دا ځل چې لا له وړاندې يې د ولسمشرۍ په ټاکنو کې د برياليتوب له پاره د نوي حکومت څوکۍ پر ځانګړو کسانو چې پخوا يې ملت ته خپل امتحان ورکړی ويشلي، د خلکو د کلونو،کلونو نيمګړې هيلې پوره کړي؟
|
