چاغوالى د شکرې ناروغۍ ، د مغزو ناڅاپي حملې ، د زړه او رګونو د ناروغيو او هم د بندونو د التهاب يا ګزک لپاره يو منلى شوى د خطر فکټور ګڼل کېده. خو دغې نوې لاسته راوړنې د استما يا ساه لنډۍ نوم هم په دې ليست کې ور زيات کړ.ډاکټر رانډ سوترلنډ
کله چې کوم شي د سالنډۍ د ناروغۍ د تشديد کېدو سبب شي نو هغه وخت نرم يا ملسا عضلات چې د هوائي لارو په شاوخوا کې موقعيت لري هغوي په دې سره تقلص کوي او ځان را ټولوي او په پايله کې د هوائي لارو په پراخوالي کې تنګي رامنځته کېږي.
د هوائي لارو دننۍ طبقه سره اوړي (احمراري کېږي) او په پاړسوب پيل کوي او مخاط هم ممکن توليد کړي.
دغه پورتني حالتونه چې ياد شول د هوائي لارو د تنګېدو او تخريش سبب کېږي او دا بيا په خپله د ساه لنډۍ د ناروغۍ نښې نښانې منځته راوړي  کوم چې : شغس کول ، د ساه لنډوالى او د سينې د تنګېدو احساس دى.
په اوس وخت کې له پنځو ميليونو څخه زيات خلک په برتانيا کې د ساه لنډۍ د ناروغۍ له درملنې لاندې دي.
څېړنو ښودلې:
· د هر يو کس په وړاندې چې د ساه لنډۍ ناروغۍ يې درلوده خو وزن يې نارمل و د هغو کسانو شمېر چې وزن يې زيات و او نوموړې ناروغۍ يې هم درلوده ، يو نيم ځل زيات و.
· په هغو کسانو کې چې وزن يې زيات و په هغوي کې د ساه لنډۍ د ناروغۍ خطر د نورو کسانو په پرتله دوه ځله زيات و.
څېړونکو ددې په هکله څه مالومات نه دى ورکړى چې د ساه لنډۍ ناروغۍ د خطر د زياتوالي لاملونه کوم دي.
سره ددې چې چاغوالى په خپله د سږو د دندو د خرابوالي سبب ګرځي په دې ډول چې د چاغوالي له امله د سږو په حجم کې کمښت رامنځته کېږي او له بل لوري په کار ده چې د تنفس په وخت کې له زياتې اندازې اکسجن څخه ګټه واخيستل شي. خو دا هم په يواځې سر د خطر په پيدا کېدو کې دومره کافي نه ګڼل کېږي.
څېړونکو دا هم ويلي چې نورې نښې نښانې او اعراض لکه د ساه لنډېدو احساس په خطا ئي سره په ساه لنډۍ ناروغۍ کې شمېرل شوي و.
د ځېړونکو د ډلې مشر ښاغلى ډاکټر رانډ سوترلنډ تر اوسه هم د چاغوالي او د ساه لنډۍ د ناروغۍ تر منځ د اړيکې پلوي کوي. هغه زياتوي: ( که په زياته اندازه د بدن په وزن کې کمښت رامنځته شي ، په ځانګړي ډول په چاغو کسانو کې ، نو د ساه لنډۍ د ناروغۍ د نويو پېښو په شمېر کې به هم د نظر وړ کمښت رامنځته شي.)
هغه دا هم وويل: ( چاغوالى د شکرې د ناروغۍ ، دماغي حملې ، د زړه او رګونو د ناروغۍ او د بندونو د التهاب يو منل شوى او د خطر ښکاره فکټور دى. دغه نوې څېړنې ښيي چې په دغه پورتني ليست کې د ساه لنډۍ د ناروغۍ نوم هم ور زيات شو.)
د برتانيې د ساه لنډۍ د مخنيوي مرکز وياند وويل: ( د ساه لنډۍ او د چاغوالي تر منځ د اړيکو لرلو په هکله له ډېرې پخوا زمانې شواهد موجود و.)
 هغه زياته کړه: ( دغو نويو څېړنو هغه پخوانۍ اړيکې بېخي رڼې کړې ، خو لا تراوسه پورې دا نه ده روښانه شوې چې سبب يې څه دى؟)
دايې هم وويل: ( نورو څېړنو ښودلى چې د بدن د وزن کمښت هم د ساه لنډۍ د ناروغۍ په روغتيا کې او هم د سږو د دندو په تقويه کېدلو کې مرسته کوي. نو د همدې مالوماتو په مټ موږ د ساه لنډۍ ناروغانو ته دا توصيه کو چې د صحي او متوازنو خوړو تر څنګ دوامداره بدني تمرينات هم تر سره کړي چې دا به له دوي سره مرسته وکړي ترڅو ځان په موجوده شرايطو باندې حاکم کړي.)
-  پاى -